أحلام شاقة
أنطونيوس نبيل*
1.
تسع سنين أحلام شاقة
بأغنِّي للنور وانحازلُه
فـ كلّ حرب بيدخلها
مافضلش منِّي ولا اتبقى
غير غنوة دايمًا بتغازلُه
بأنزفها مش بس بأقولها
2.
يا شمس يا قريبة وغايبة
إمتى برجوعِك تحييني
وأشوف قيودي حبال دايبة
مالهاش ضوافر تأذيني؟
يا ضحكة ناعمة بتندهلي
أوِّل ما على كتفي تنامي
الكون بحالُه يزهزهلي
والفرحة تُحضن أيامي
مهما الحيطان هـ تكون أقوى
مِن صوتي والليل ملازمني
أنا ليَّا فـ عيونِك مأوى
مافهوش مخاوف تهزمني
3.
فـ الحلم للشمس بأغنِّي
وبقلبي فـ العتمة شايفها
بأنده عليها ومستنِّي
تفتح عيوني بشفايفها
4.
الليل سمعني وقام قاللي
باين عليك راح تتعبني
صوتَك بيزعجني تمللي
دبانة مش راضية تسيبني
هوَّ انتا غاوي تصدعني
بتغني علشان تِألِمني
ولَّا انتا عاجبك كده يعني
مِن أحلى نومة تقوِّمني؟
باين عليك مجنون خِلقة
لو كنت عيَّان فهِّمني
وإياك تفكَّر راح تِلقى
فـ الغنوة مهرب ليك مني
نقَّطني بسكوتَك يا ابني
أنا نومي مش حِمل أغاني
دوشني زَنَّك وتعبني
تقولشي أشواك فـ وداني
صوتَك رخم زيّ البرغوت
تافه لكنُّه مزهَّقني
لو نمت ساكت مش هـ تموت
بالعكس هـ تعيش صدَّقني
اهمد بلاش بقى تقرفني
وإلَّا هـ أكلك بسناني
أنا قد قُولي انتا عارفني
اسكت وماتغنيش تاني
5.
الريح قالتلي أوعى تعاندُه
مانتاش فـ فيلم لطيف ساخر
دانا شوفتْ إبليس بيساندُه
بجيش مَهُول مالهوش آخر
لو تفّْ ع الأرض يخلِّي
م الرُّعب تسجدلُه ملوكها
كان لمَّا بيحبّ يحلِّي
يبلع نجوم كاملة بشوكها
مطلوب من الكلّ يطاوعُه
حتَّى الغيلان جوَّه الحواديت
دا بسّ لو مسّ بصابعُه
أعتى الجبال هـ تصير فتافيت
الليل أمر ومافيش مخلوق
فـ الدنيا يستجرا يجادلُه
كل اللي عاش مِن ظلمُه يدوق
ما قالشي غير شِعر فـ عَدلُه
بُص فـ عينيه هـ تلاقي وحوش
مسعورة بتبُخ عقارب
دي معركة تخاف منها جيوش
معقول يا بأف انتا تحارب
دا سيناريو متكرر محفوظ:
صرصار هزيل مالهوش لازمة
يسكت يطاطي يعيش محظوظ
ينطق هـ ياخد بالجزمة
6.
طنِّشت كل كلام الريح
الليل زغر زغرة قويَّة
بحلق فـ وشي أنا شوفت ضريح
فـ عيونُه بيبحلق فيَّا
لكنِّي رديت كالعادة
وماهمنيش من تهديدُه
وفضلت فـ الغنوة اتمادى
مع إن كرباجُه فـ ايدُه
كرباج مخيف مليان حراشيف
زيّ الأفاعي بيتمطَّع
موهوب قوي فـ صُنع البلوبيف
مستنِّي على كيفُه يبرطع
على جسمي يِرْزَع ويشخبط
آيات من الفنّ العالي
وإيَّاك تقول رسمُه ملخبط
دا أصلُه فنَّان سيريالي
مهما اتجلدتْ ولحمي اتهان
يا جراحي لازم تبتسمي
اجلدني ياللا كمان وكمان
ماتسيبش ولا حتَّة فـ جسمي
7.
يا ليل سخيف مهزوز وجبان
يا كدبة معدومةْ الألوان
يا كُتلة م الغيظ هـ تفرقع
أنا مش بتاجر بالأحزان
ولا غاوي أموت كده بالمجان
ولا ناوي أسايسك وأتمرقع
أنا قُلت مهما تكون جبَّار
مهما فـ حيطانك هـ تعلِّي
الشمس ما تحوشهاش أسوار
فـ الحلم بتجيلي تمللي
وتقوللي غنّي ولا تبالي
لمَّا أوحشَك قوللي تعالي
صوتَك دا باب مفتوح ليَّا
تقدر فـ قلبَك تلقاني
بأضحك وأمزَّع أكفاني
والموت ما يقدرش عليَّا
8.
قالوا اللي يتحدَّاك أرعن
دا مافيش سواك فـ الكون غالب
يا ليل يا مارد متفرعن
يا حيطان هلاك طارحة مخالب
لو كنت فاكر هـ أركعلك
وأتمنى أكون بُقعة فـ نعلك
تُشُخط فـ قلبي يدمَّعلك
وأبلع لساني وأخاف وأنهار
لو كنت فاكر تهديدك
يجعلني مِن ضِمن عبيدك
كما دودة مخمودة فـ إيدك
يبقى انتا ليل لامؤاخذة حمار
إياك تقوم وتشوَّحلي
تؤمر بتعذيبي وسحلي
تُزغُر وبعدين تردحلي
وعينيك فحيح بيطُق شرار
دي أمور خلاص بايخة قديمة
زي الرصاص كده فـ السيما
يا ليل فشينك مالوش قيمة
خلِّيك نبيه يا أبو مخ فِشَار
9.
معقول هـ تمنعني مشقَّة؟
معقول شفايفي هـ يتنازلوا
عن غنوة بأجمع أشلائها؟
طبعًا يا ليل قطعًا “لأة”
دا غُنايا بالدَّم أنا غازلُه
وفـ صوتي شمس أنا بأخلقها
أنطونيوس نبيل*
———————–
* أنطونيوس نبيل، خريج طب القصر العيني، شاعر و ملحن ورسام ومترجم.
كتب العديد من القصائد بالفصحى وبالعامية، ولحن العديد من الأغنيات التي غناها مغنون شبان، منهم أحمد شوقي.
وهو مؤسس كيان رهاف للإنتاج الفني.
آخر أغنياته الملحنة والتي غناها أحمد شوقي هي “جنب الحيط”.
