فيروس كورونا بدون تهويل ولا تهوين
د احمد دياب
__________________
– إيه هي أعراض الكورونا؟
= السعال والحمى وضيق التنفس.
– ازاي بتتنقل الكورونا بين الناس؟
= عن طريق انتقال الرذاذ الخارج من جسم شخص مصاب إلى جسم شخص سليم، سواء بشكل مباشر عن طريق سعال أو عطس المصاب في وجه السليم أو بشكل غير مباشر عن طريق لمس شيء عليه رذاذ شخص مصاب وبعدين لمس الفم أو الأنف أو العين.
– إزاي تحمي نفسك من انتقال العدوى؟
= البعد عن أماكن الزحمة، وعدم وضع ايديك على أجزاء وجهك (الأنف والفم والعين) إلا بعد غسل ايديك جيدا.
– كام نسب وفاة المصابين بالمرض؟
= النسب تختلف من دولة لأخرى، فبعد شهرين من الإعلان عن انتشار المرض
الصين: عدد المصابين حوالي 80000، توفى منهم حوالي 3000، يعني نسبة الوفاة حوالي 4%
إيران: عدد المصابين حوالي 400، توفى منهم حوالي 40، يعني نسبة الوفاة حوالي 10%
– مين المصابين الأكتر عرضة للوفاة؟
= كبار السن: من 70 ل79 سنة إحتمالية وفاتهم 8%، وأكبر من 80 سنة احتمالية وفاتهم حوالي 15%
أما من هم في سن من 10 ل50 سنة فاحتمالية وفاتهم أقل من 0.5%
المصابين بأمراض مزمنة: القلب: احتمالية وفاتهم 10.5%، السكر: احتمالية وفاتهم حوالي 7.5%
أما غير المصابين بأمراض مزمنة، فاحتمالية وفاتهم أقل من 1%
– هل فيه علاج ضد الفيروس؟
= مافيش أي علاج أو تطعيم ضد الفيروس لحد الآن. واستخدام المضادات الحيوية مالوش لازمة مع الانفلونزا عموما. واستخدام مضادات الانفلونزا المعروفة الموجودة حاليا مش بتأثر في الفيروس ده. التعافي من المرض متوقف على مدى قوة تحمل الجهاز المناعي للمريض، والتعامل مع الأعراض المصاحبة للمرض (السعال والحمى وضيق التنفس) لتخفيف خطورتها على الجسم، وده طبعا بيتم على إيد الأطباء المتخصصين في المستشفيات المجهزة لاستقبال الحالات المصابة بالمرض.
